जगाच्या विकास प्रवासात भारत राहणार केंद्रस्थानी

सोलापूर : प्रतिनिधी

देशांतर्गत विकास, परराष्ट्र धोरण आणि संकटकाळी अन्य देशांना केलेली मदत पाहता आगामी काळात जगाच्या विकास प्रवासात भारत केंद्रस्थानी राहणार आहे, असे प्रतिपादन विचारवंत अनय जोगळेकर (मुंबई ) यांनी केले. जनता बँक कर्मचारी सांस्कृतिक मंडळाच्या ४७ व्या वर्षाच्या व्याख्यानमालेचे दुसरे पुष्प श्री. जोगळेकर यांनी सोमवारी शिवस्मारक सभागृहात गुंफले. 

प्रारंभी सोलापूर जनता सहकारी बँकेचे अध्यक्ष सुनील पेंडसे यांच्या हस्ते दीपप्रज्वलन आणि गणेश पूजन करण्यात आले. याप्रसंगी व्यासपीठावर सोलापूर जनता सहकारी बँकेचे अध्यक्ष सुनील पेंडसे, बँकेच्या संचालिका चंद्रिका चौहान, मुख्य कार्यकारी अधिकारी मुकुंद कुलकर्णी, सहायक सरव्यवस्थापक देवदत्त पटवर्धन उपस्थित होते.

विचारवंत अनय जोगळेकरांनी 'बलशाली भारत विस्तारणारी क्षितिजे' या विषयावर मार्गदर्शन केले. श्री. जोगळेकर म्हणाले, जागतिक पातळीवर भारताची प्रतिमा वेगाने बदलत आहे. जगातील अन्य देश भारताकडे नेतृत्वाच्या आशेने पाहत आहेत. कोविड सारख्या जागतिक महामारीवेळी तब्बल १०० देशांना लस पुरवठा करून भारताने जगात आपली वेगळी ओळख निर्माण केली आहे. आज जगात भारत पाचवी अर्थव्यवस्था आहे. जगातील सगळ्यात मोठ्या ५०० कंपन्यांपैकी २५ कंपन्यांचे मुख्य कार्यकारी अधिकारी भारतीय आहेत. तब्बल एक कोटी ४० लाख भारतीय जगभरात कार्यरत आहेत. त्या देशांमध्ये स्थैर्य आणि शांतता राखण्यात भारतीयांचा मोठा वाटा आहे.

भारतात तयार होणारे हजारो किमीचे महामार्ग, आरोग्य व्यवस्थेमध्ये होत असलेला मूलभूत बदल, रेल्वे, डिजिटल अर्थव्यवस्थेमध्ये केलेली क्रांती या सर्व अनुभवांचा फायदा आफ्रिकन, आशियाई आणि काही युरोपियन देशांच्या विकासासाठी भारताला होऊ शकतो, असेही व्याख्याते श्री. जोगळेकर यांनी सांगितले.

याप्रसंगी बँकेचे संचालक आनंद कुलकर्णी, अजितकुमार देशपांडे, व्याख्यानमाला समितीचे प्रमुख मदन मोरे आदी उपस्थित होते. शार्दुल भंडारकवठेकर यांनी सूत्रसंचालन तर सुमित श्रोत्री यांनी आभार प्रदर्शन केले.
---------
उद्या व्याख्यानमालेत
जनता बँक कर्मचारी सांस्कृतिक मंडळाच्या बौद्धिक व्याख्यानमालेत उद्या (मंगळवारी) निवृत्त शास्त्रज्ञ काशिनाथ देवधर 'संरक्षण क्षेत्रात आत्मनिर्भर भारत' या विषयावर मार्गदर्शन करणार आहेत. या व्याख्यानास सोलापूरकरांनी सायंकाळी ६.३० वाजता शिवस्मारक सभागृहात उपस्थित रहावे, असे आवाहन जनता बँक कर्मचारी सांस्कृतिक मंडळातर्फे करण्यात आले आहे.